Dad badan oo qaangaar ah ayaa caadi ahaan laga yaabaa inay timaha kasii yaraadaan markay sii weynaadaan, laakiin timo daadashada ama timo beelka carruurta ma aha wax caadi ah waxayna sababi kartaa walaac aad u badan, gaar ahaan marka ay caruurta arkaan in timahooda ay sii yaraanayaan.
Waxyaabaha caruurta u keeni karo timo beelka waxaa ka mid ah caabuqyada bakteeriyada ama fangaska, walbahaarka, iyo jiid jiidka timaha.
Si kastaba ha ahaatee, sababta ugu badan ee keenta timo beelka carruurta ayaa ah cambaaraha madaxa ku dhaca oo uu keeno caabuqa fangaska, waana caabuq la daaweyn karo.
Dhakhaatiirta waa ay daaweyn karaan waxyaabaha ugu badan ee timaha ka lumiya caruurta, badanaana timaha way soo noqo karaan haddii si fiican loo daaweeyo waxa keenaayo timo beelka.
Maqaalkaan waxaan ku eegeynaa sababaha suurtagalka ah ee keena in timaha ay ka daataan caruurta, astaamaha kale ee lagu arko caruurta, iyo sida loo daaweeyo xaaladahaan.
Maxaa keeno timo daadashada caruurta?
Sababaha suurtogalka ah ee timaha uga daataan caruurta waxaa ka mid ah:
Cambaarta madaxa
Cambaarta madaxa waa caabuq uu sababo fangas, kaasoo ku dhaca maqaarka, waxaa cunugga madaxiisa lagu arkayaa finan guduudan oo sida faraantiga oo kale u wareegsan.
Baro gud guduudan oo cuncun leh ayaa laga yaabaa inay ka soo baxaan madaxa. Waalidka ayaa laga yaabaa inuu arko in cunugga uu si xad dhaaf ah u xoqoaayo madaxiisa.
Xoqitaanka badan ee nabarka iyo dhaawaca nabarka uu u geesanaayo madaxa ayaa si tartiib ah u sababi kara in timuhu daataan.
Carruurta qaarkood ayaa waliba timaha jiid jiido si ay isugu dayaan inay yareeyaan cuncunka badan ay dareemaayaan.
Timo daadashada ayaa badanaa ku dhacdo hal ama laba meelood oo madaxa ka mida, oo ay ugu badan tahay meelaha cuncunka badan ka jiro ee ku hareereesan nabarka.
Difaaca jirka
Mararka qaar habdhiska difaaca jirka ayaa weeraro unugyada ay kasoo baxaan timaha, waxay marmarka qaar sababi kartaa bidaar guud ama in timaha ay khafiif noqdaan. Carruurta qaarkood waxaa kaloo ka daato timaha sunniyaha iyo baalasha indhaha.
Caruur badan oo qaba xaaladdaan waxay madaxa ka dareemaan olol marka ay timuha daadanaayaan.
Ma jirto daawo loo isticmaalo timo daadashada uu keeno nidaamka difaaca jirka, laakiin daawooyinka qaar ayaa laga yaabaa inay caawiyaan joojinta jirka inuu weeraro timaha.
Jiid jiidka iyo maroojiska timaha
Carruurta timaha jiid jiida ama qalloociya ayaa laga yaabaa inay dhibaato u geystaan unugyada timaha ay kasoo baxaan, taasoo keenta inay timuhu daataan.
Carruurta qaarkood waxay timaha u jiidaan walaac awgiis, waxayna mararka qaar noqon kartaa xaalad la xiriirta maskaxda, cunuggana uusan iska celi karin jiid jiidka timaha xataa haddii uu isku dayo.
Marka cunugga uu joojiyo jiidista ama maroojinta timaha, dib ayay usoo baxaayaan timaha, timo jiidista waa nuuc ka mid ah walwalka, sidaa darteed waa lama huraan in marka hore la maareeyo waxa ilmaha u keenaayo walbahaarka ama walwalka.
Cadaadiska basada
Xirashada waxyaabaha cadaadiska iyo ciriiriga galiya basada ama madaxa sida koofiyadaha cariiriga ah, taakooyinka dhuujisan, amd tidcinta timaha ee adag, ayaa laga yaabaa inay timaha saaraan cadaadis keenaayo in timaha ay soo ruqaan.
Ka dibna waxaa madaxa lagu arki karaa meelo banaan oo ay timaha ku yaryihiin, timo daadashadana waxay ku badan tahay meelaha uu cadaadiska ugu badan ka jiro.
Dhaawaca basada
Dhaawacyada ku imaada basada sida gubashada ama daqarrada ayaa dhaawici kara timaha, taasoo keeni karta in timaha ay ka daataan meesha dhaawaca ah, meelaha guban ee madaxa ka mid ah ayaa laga yaabaa inay waligood kasoo bixin timo.
Dhaawacyada kale ee soo gaara madaxa ayaa u baahan daaweyn deg deg ah sababtoo ah dhaawacyada madaxa oo aan la daaweyn waxay dhaawici karaan dhismayaasha unugyada hoose ee timaha waxayna xitaa sababi kartaa timo beel joogto ah.
Goormee ayaa dhakhtar la geeyaa ilmaha?
Timo daadashada waa dhibaato caafimaad, sidaa darteed waa muhiim inaad geeso dhakhtar cunuggaaga marka aad aragtid in cunugga timihiisa ay sii baaba’aayaan.
Qaar ka mid ah waalidiinta ayaa argagaxa marka ay arkaan timo badan oo ku jira shanlooyinka ama burushka timaha ay ilmaha ugu shanleeyaan ama ay ku shanleestaan.
Laakiin sida caadiga ah carruurta timohooda ayaa laga yaabaa inay aad u jilcanyihiin oo haddii loo shanleenaayo cunugga ay timihiisa iska soo raacaan shanlada.
U geey dhakhtar cunuggaaga haddii:
- Cunugga uu madaxa ka dareemaayo cuncun ama xanuun .
- Timaha sunniyaha iyo baalasha indhaha ay daataan
- Ay jiraan meelo madaxa ka mid ah oo aan timo dhan lahayn
- Timaha cunugga oo aad usii baaba’aayo
- Cunugga oo dhaawac kasoo gaaro madaxa
Ugu dambeyntii, tima daadashada aad ayay ugu badan tahay ilmaha, mana aha wax ku cusub carruurta dhexdooda. Arrimo badan ayaana sababi kara timo daadashada, oo ay ku jiraan caabuqyo, iyo walaac, badankoodna waa la daaweyn karaa.